Ashartanjung's Blog

Suhut Mandokon Get Mambaen Orja

Assalamu alaikum ww.

Bahat hormat nami santabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi ompui sian bagas godang sangape nai patobang di banuaon.

Baen madung do nangkin banjaran ni hatobangan mangalusi sasudena. Di haranion mada di hata ni burangir nami napadua nai on. Baen madung tartogu togu gadis ni mora ma jolo tama dokonon tu haratak on. Baen lomo dot godang ni roha. Na maranak soni na marparmaen. Ampapaga di na gornop. Baga baga namion aranion dope so tarbaen. Namarmaksud ma ami da paijur balingku marbaen api timbus maripul. Maksudna mambaen orja siriaon. On ma patobang adat sapanjang paradatan.

Diharanion na get mambaen sada orja siriaon. Na sonon ma amion dalan marsapa. Sanga layak ma rohaion tarbaen kita on ma sada orja siriaon. Molo na layak do rohai, ison ma amion pasahatna dohot pasanggalna. Arana anggo amion ngana adong tau pande nami di son. Na suang doma on hami sangga na sigambaron.

Songoni di hata ni burangir nami na patoluna. On ma nangkinin na get mabaen sada orja siriaon. Naget mangido tolong do ami on di gogo ni gaja. Songoni bisuk ni landuk. Songoni sora ni onggang. Ngon parbatang ni galoga ni songgopan ni layang layang. Pala mora nami dot hatobangon bope na ipatobang naget manolong. Ulang ma nian dilanglang pau sayang. Aropku tar botima hata sian kami. On pe marsada hata ma amion sasudena. Usudahima dohot salam. Wassalam.

Hobar Suhut Minta Bantuan Naposo Nauli Bulung

Assalamu alaikum ww.

Bahat hormat nami santabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi ompui sian bagas godang sangape nai patobang di banuaon.

Songon jia nangkin benege satontang Suhut Siabolonan na mangido gogo di gajah. Jadi onpe uompaskon ma hata tu barisan ni naposo nauli bulung. Haranii usorahkon ma hata on tu barison muyu. Anso homu doma manjamitaon sanga songon jia doma maksud dot tujuanna. Sanga martarimo do tu tondi dot badan muyu, ima satontang na get mambaen orja sirian. Patobang anak sapanjang paradatan. Boti mada. Wassalam.

Jawaban Naposo Nauli Bukung Tentang Permintaan Suhut.

Assalamu alaikum ww.

Bahat hormat nami santabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi ompui sian bagas godang sangape nai patobang di banuaon.

On ma nangkin binege barisan suhut siabolonan sian haratak on namangido gogo di gaja. Ami mai antong barisan naposo nauli bulung. On pe da satontang namangido tolong nangkin binege sahut sian haratak on. Najagit maon tondi dot badan nami. Hari ida ngada jungada ami marsarak tahi dohot pokat dohot hatobangon bope na ipatobang. Muloi sian narinca narobi sampe sadarion. Jadi onpe dan. Najagit mo on tondi dot bandan nami sian naposo nauli bulung, Usudahi ma dohot salam. Wassalam.

HOBAR SUHUT MENETAPKAN HARI HORJA

Olo tutu mada songon burangir nami na padua nai on. Di sapa sapa nami nangkin sasudena. Madung dapot no nangkin panamana. On ma sian barisan ni hatobangon. Di ujung ni hata nangkin benege idokon homu do. I dokon godang dot menekna horjaon. Ari dot atiana nangkin benege. Haranion mada banjaran ni mora nami bope na ipatobang. Anggo satontang ni ari tama dokonon. On ma ari Akad. Songoni satontang panggodangna dot menekna. Ima sabahat 1200 rumah tangga. Songoni songon pancalona ma tama dokonon. Na partama sekali. Ima orbo janggut namarmeam i balean ni huta. Mula ro simarondop udan, marlojong tu taruma. Ima nangkin na petama. Napaduana antong. Baen adong do Manuk na marindalu. Na manjampal i padang tobu. On ma tambahan pancalona. Tar saimada hatana. Usudahima dohot salam. Assalamu alaikum. Ww.

Hata hata di Wirid meninggal terakhir

Di mulai dengan mukaddimah

Madung rap runggu ima di hamparan siluluton on

Parjolo ami mangaturkon hormat dohot mangido mohop ampot adong hata nama nasala

Olo mada tutu dia manangkin bona bona ni hata, ima na mantaringoti di hamamulak ni simatobang nami ma tama dokonon halak si Fendi na maranak marama. Ima di hira hira tolu hari na lewat. Ibana on manopoti kudorat ni Allah SWT atau pe namarpulang tu Tuhan ta. Disima koum koum ta mangucapkon Inna lillahi wainna ilahi rojiun.

Marnida mada ami isi, ngana boban nami sada halak on. Ami jamitaon do tu tetangga, songoni kum sisolkot nami sasudena. Sangape ami palu do on tong tong saro najolo ataupe pangumuman di mesjid mesjid jamik na adong di sekitar kampung namion. Na manjamitaon melalui pengeras suara bahaso ami on madung haurakan bilangan. Mudah mudahan satombal naso adong halanganna madung runggu ma nian ro manopotkon kami. Di haroro ni koum nami, rodo patidaon lan lan ni bohi dohot ias ni ate ate marjabat tangan mandokon hata tauziah hata sobar sobar tu ami muloi sian tolu ari na lewat di hari nasolpui.

Harani di tolu hari nasolpui, hami boto do ngana adong tau pande nami, isi ma ami pasahat dot pasanggal tu natoras natobang, songoni tu barisan ni guru guru nami tarlobi lobi tu barisan ni naposo nauli bulung. Mudah mudahan nian sasudena madung dapot do on salosena dohot na sebaik baikna. Baik ia na mamandiaon, mangkafani, bope manyolatkonna tu Musojid na mulia an. Na satorusna mangobanna tu balian ni huta. Patop na tusi dohot donganna na dua tolu.

Isi pe jongjong do hami mandokon hata mauliate hata tarimo kasi, sareto marpangido hami disi anso ibaen amal amalan tolu borngin marturut turut. Mudah mudahan sasudena madung dapot do on tarbaen kita dohot na sadeges degesna. Di haranion pe da koum nami, ngana baen na lobian kami on di amal amalan sangape baca bacaan sifat na kuaso sian allah SWT. Tai antong baen na songoni do ita pasomal sian ompung na na porjolo sunduti. Arani, tolu borngin maia marturut turut. Di haranion da tu maradu koum nami sasudena. Namarmaksud ma ami on mambalun ambal siluluton on.

Na satorusna da. Na songononma ami on mandokon hata hoase tu maradu parkouman nami namadung amgurupi ami. Dungi buse ngasai binoto, adong na sala, baik ia tu panyambutan nami, baik ia parkataan sasudena sian ahli bait. Mangido mohop na sagodang godangna ulang manjadi parsangkutan naso pade di hita sian on tu pudi nihari. Manjadi amal ibadah ma nian dihita on sasudena.

Na satorusna dah Mangido hami tu Allah Taala mudah mudahan amal imalan atau bacaan na hita baen on, satontang pahalona ilimpahkon ma nia tu ruh ni junjunganta nabi besar muhammad SAW, songoni keluarga dot kerabatna, songoni kaum muslimin muslimat namandung purjolo mulak tu rahmat ni Allah AWT, dohot na khususna ima di alamarhum simatobang nami dot halak si Pendi namarangka marangi. Molo ibana di bagasan ni halapangan, murmur malapang ma nian. Mula ibana di bagasan ni hatorangan, murmur matorang ma nian. Ning rohangku da ngana ginjang be hata na get ami ami sampeon. Di son ma ami bahat mangido mohop mangido izin. Tar botima hatana Assalamu alaikum WW.

Kobar satontang padan parjanjian

Mukaddimah

Assalamu alaikum warohmatullohi wabarokatuh

Bahat hormat nami santabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi ompui sian bagas godang sangape nai patobang di banuaon.

Olo iatutu, songon jia nangkin hata na ipatujolo ni parkulahan nami nangkin. Ngana salain nangkin binege nasatontang marsapa homu nangkin tontang padan parjanjian, sanga na togu dayo sanga na tutu napeto sanga na togu dayo, sanga namadung adongon tukar marubana, Sogari isuru on nangkin binege, na tutu napeto do homu manyambut margodang marlomo ni roha. Tai nga sai binoto ningkomu nangkin ampot adong on tukar marubana, on ma homu manjalang tahi dot pokat anso tarpatahi dohot pokat, anso tarpasaho songon jia jalan panamana so tarpasahut hagiot di daganak na dua. Sasudena nangkin binega mandung do mangalus barisan ni mora muyu. Songoni nasodong do nangkin tukar marubana, songoni barisan ni kahanggi muyu ima barisan ni anak boru ni mora muyu. Ibana naso dong dope tukar marubana. Gari adong ning ibana tukar marubana, nangkan na ro dope ami tu banua muyu mandokonna bahaso anso ulang marsuo hita songonon. Songonimuse mompas hata tu barisan mora ni mora muyu. Ami peda ngana dong tukar maruba ni on. Pandan di Pidoli na ijombur on marpora pora, Padan parjanjian nasanoli, naso adong dope tukar marubana. Sugari suru pe magodang aek di tapian, ngada na maruba pasir. Na bontar najoloi, nabontar dope torus sannari.

On peda tarbotima hata sian barisan ni mora mompas ma hata on tu barisan ni natoras natobang. Tarsaimada hatana Assalamu alaikum WW

Kata Terakhir Tuan Rumah Dalam Pesta Pokat Horja

Mukaddimah

Bahat Hormat nami marsantabi sapulu, sapulu noli ami marsantabi tu sude maradu parkouman nami na marula markahanggi maranak boru, songoni marmora, songoni tu barisan ni hatobangon bope na ipatobang, simurung lobi tu banjaran ni haguruan nami na rap runggu di haratak siriaon on.

Olo ia boti, marnida ma ami dison di sabat ni janggal ni parkouman nami sasudena. Na madung mangurupi hami ima satontang hata tangking nami. Songoni hajat dot maksud nami, mudah mudahan nian madung dapot tarsaleseon sasudena. Madung dapot doon rumbuk ni parokatanta sasudena. Di haranion mada, anggo hami da hanya tarimo kasi nasagodang godangna maia na bisa ami lehen. Anggo pambalos dot panyaru do ngana adong jiami. Allah Subahana wataala doma na ami haropkon mambalosna.

Songoni di hata na paduana. Na jimat ma najimat, angke batupe nangkon na itungkolan do. Nian na nangkan suruon nami dope on naposo bulung nami na ipas langka manopotkon pintu pintu ni koum nami sada parsada. Disi naron obarna suada halananganna rap marlagut ma ita tu haratak nami ima di hari akad. On ma naget mambaen sada orja. On ma patobang anak sapanjang paradatan. Taonna taon sabagas.

Di napatuluna ngasai binoto nangkin adong hata hata nami songoni panyambutan nami na urang tama na hurang tupa. Amion mangido moof mangido izin. Ulang nian adong parsangkutan na so denggan disisi ni Allah Subahanahu Wataala. Songonima hata na bisa usampeon. Urang lobina mangido moof. Usudahima dohot salam. Assalamu alaikum ww..

Assalamu alaikum waroh matullahi wabarakatu. Bahat hormat nami tu sude maradu karkouman nami sasudena. Songoni na marmora markahanggi maranak boru songoni marhatobangon bope na ipatobang , songoni juo barisan ni guru guru nami.

Harani parpokatanna nangkin na madung dapot do sude tamana. Sasudena madung binoto do na marlomo dohot margodang ni roha. Jadi di son komu mandokon hata howasi hata tarimo kasih di sabat janggal ni sude maradu parkouman muyu. Di son idokon homu ngana adong ison lehenon muyu sebagai balosan. Hanya taroma kasi maia ning komu na tarlehen komu. Tuhan mambalosna pangidoan muyu. Anggo satontang nii do, anggo satontang ni tarimo kasih, inda maua bei da. Arana suang doon hita na maridi di pancur. Margonti gonti artiannya. Molo tolap tuamu suatu hal, angkon hami ma mangurupina. Molo tolap tu hami di sada ari aduan, angkon na homu ma mangurupina. Napas doon salaklak sasingkoru, sasanggarsaria ria, saanak saboru, na suang doon hita marsada ina. Jadi on pe sudena ita sorahkon maon tu Allah Subahanahu Wa Taala.

Di haranii nangkin binege na satorusna, na jimat ma ningkomu najimat, tai batu ipe angkonna itungkolon do. Arani jiai? Nian angkon sisuruon kon muyu dope daganak na dua sauduran na manopoti tangga tangga ni parkouman muyu. Suada halanganna ningkomu. Di hari akad malojo gorarna tama dokonon anso rap runggu ma hita jolo tu haratak muyu on mambaen horja siriaon. Na patidaon godang ni roha. Ima namambaen orja ima patobang anak sapanjang paradatan. Anggo satontang niida, di nangkin pe di hata ni burangir na dua dot na patoluna, na madung jagit mon tondi dot badan nami.

Dungi buse nga bonoto nangkin adong adop adop muyu na hurang tama dot hurang tupa di panyambutan nami, nangkin homu mangido mohop. Hami pe soni do ulang songon lading na tajom bariba. Ami pe mangido mohop do hami nga sai bonoto adong parlangkaaan songoni parkataan nami na hurang pas. Ami mangido mohop tu barisan ni suhut siabolonan sian haratak on. On pe usudahi ma dohot salam . Asslamu alaikum ww.