Jawaban Hatobangon Satontang Orja
Mukaddimah
Assalamu alaikum ww.
Bahat hormat nami santabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi ompui sian bagas godang sangape nai patobang di banuaon
Songonjia nangkin jamita ni suhut siabolonan di burangir napadua naion. Ara ni madung gok nangkin ning komi pangisi ni bagas, mulao sian pantar luar dot pantar tonga. Ampapaga ningkomu di na gornop. Baga baga ningkomu on dope anso tarpatidaon. Iharanion ningkomu on ma homu na marmaksud mambaen orja siriaon. Napatidaon lomo ni roha tarlobi lobi di haroro ni parmaen. Mambaen orja pabagas anak ma jolo tama dokonon. Pabagas anak sapanjang paradatan. Songoni buse ningkomu na ro do sunggul sapa muyu. Anggo homu sian barisan suhut siabolonan ningkomu ngana adong tahu pande muyu ison.Hanya na iharopkon komu tolongan ni ita sama sama markoum maia ning komu, songoni barisan ni anakboru muyu tarlobi lobi tu mora muyu, lopus tu na toras hatobangon. Di haranion mada homu pasahat pasanggalna. Sanga na layak do ningkomu tarbaen kita on. Molo na layak do ningkomu tarbaen kita on. Songononma homu manyambut dot margodang ni roha. Tai nga sai binoto ning komu nga tarbaen kita on, na songononma homu manjalang tahi dohot pokat. Sanga songonjia dalan panamana. Anggo satontang nii da ningrohangku. Di burangir na pertama pe nangkin ning rohangku. Na lumobi do ami nangkin manyambut dot marlomo margodang ni roha. Tontu di burangir na paduana nangkin songonon homu pasahat pasanggalna. Anggo saat ni on da ning rohangku. Ngana sahat na sannarion. Sahat na robian doon. Muloi sian ompunta na parjolo sunduti. Arani ison hami pe namarsada hata do. Na jagit maon tondi dot badan nami on sasudena. Onma satontang pasahat dot pasanggalna.
Di burangir ni homu na patoluna nangkin binege. Baenna songonon ningkomu na marmaksud paijur balingku ningkomu gorarna. On ma mamben api martimbus di halaman. Mambaen orja siriaon. Patobang anak sapanjang paradatan. Na marmaksud ma homu ning komu mangido gogo di gaja. Songoni bisuk di landuk, songoni sora di onggang. Taringot ni bisuk ni landuk dot sora ni onggang, itaon mai sasudena. Itama na juguk marlingkar di haratak taon sasudena. Lobi lobi di luar ni haratak taon na madung ita jamitaon di munyogot ni arii. Anggo satontang niido ning rohangku, ita on sasudena manyambut doon dot marlomo dot margodang ni roha. Tai antong anggo satontang gogo ni gaja. Baen ison do antong barisan ni raja ni naposo bulung. Ita sunggul sapa ma tu ibana. On pe tu ibana doma ompasan ni hata ona. Songonima. Wassalam.
Ashartanjung's Blog 
Tinggalkan komentar