Ashartanjung's Blog

Hata hata di Pekuburan

Puji syukur ita panjatkan tu hadirot ni Allah SWT na madung mangalehen hairasan di hita sasudena asa bisa ita lugut marpungu di tano pamakaman on.

Satorusna solawat dohot salam tu junjunganta nabi Besar Muhammad SAW, ima na marlapaskon Allohomma solli ala sayyidina Muhammad wa ali Sayyidina muhammad. Ima na ita haropkon syafaatna mulai sian dunia on lopus tu ari na parpudi.

Bahat hormat nami marsantabi sapulu tu koum nami sasudena baik ia namarula marrkahanggi maranak boru marmora. Songoni tu barisan ni hatonagon ipasurung dot ipalobi, songoni juo tu barisan ni haguruan inganan nita mangido ajar dohot poda.

Dia ma nangkin songon lidung nami di halaman ni bagas nami, mangido ami nangkin tu koum nami sasudena. Anso rap runggu ita on, ima maroban almarhum ompungon tu musojid na muliaan, lalu mangobanna tu balian ni huta. Alhamdulillah anggo satontang Pardu kifayahna madung tarlaksana on ma on dohot na sadeges degesna. Amion mandokon maule ate hata tarimo kasi na sagodaang godangna.

Di bagasan ni i da koum nami, di sabat janggal ni koum nami sasudena. Na madung ro mangurupi ami. Sareto mandokon hata taksiah sobar sobar tu hami. Ison ma amion mandokon hata tarimo kasi na sagodang godangna. Songoni taringot di gogo ni sinuan tunas nami. Naposo bulung na madung mambaen ingananna di balian ni huta on. Anggo songon pamalos do ngana adong riak dot gogo di hami. Hanya ucapan mauliate maia na tardokon kami.

Ibagasna ni ida koum nami. Nga saibonoto adong panamu nami na hurang tama dohot na urang tupa. Arani ami on imasa masa siluluton. Amion bahat mangido mohop tu koum nami sasudena.

Ibagasan nii, baen songonon do da na madung ipajolo ni guru gurunta na parjolo sunduti. Molo adong na hurak dibilangan ning ibana. Nangkon ibaen do on maramalan tolu borngin marudur udur.. Disimada leng marpangido ami tu koum nami sasudena. Tarlobi lobi di bisuk ni gurunta. Muloi naron borngin. Anso rap runggu jolo hita dung siap sumbayang Isya. Ima tu haratak nami. Ima namambaen amalan tolu borngin maruduir udur gorarna.

Songoni ibagasan nii baen na martinuntun hita nangkin ngon haratak na be manopotkon kami. On pe da les mangido doon hami tu maradu koum nami sasudena. Ulang kita jolo on marsarak di tonga padang. Baen sompat doon ami pamilas aek na borgo gorarna. Songoni pamasak na mata.Anso jolo tu bagas nami ma jolo hita langka. Baru manyarak langka tu haratakna be. Aropku da anggo lidung na ginjang ngana adongon be tarjamitaon kami. Urang dot lobina on ami bahat mangido mohop. Assalamu alaikum waroh matullohi wabarokatuh.

Hata Suhut Napatibal sere Tingkat 3

Mukaddimah

Assalamu alaikum ww.

Bahat hormat nami santabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi ompui sian bagas godang sangape nai patobang di banuaon.

Olo iya tutu. Songon jia nangkin ami mangido ari dohot atia. Na patidaon lomo dohot godang ni roha. Anso dapot dihomabangkon di jolonta sasudena. Mudah mudahan nangkin madung dapot doon kaizinanna.

Haranion mada mora nami madung tangkas ihombangkon di jolonta sasudena. Na ipayalkkon di ginjang amak lampisan. Na marpinggirkon abit narara. Na ditabusan sian Pasar Mandailing. Dohot doah manian marlapis lapis manian hakouman. Di parkawianan ni nadua simanjujung. Silang sae suada mara. Lopus ima tu ari nahapudian.

Na dipayakkon di ginjang indang. Parsegean induri pamiari. Tu ginjang manian daganak nadua mandapot hagabean. Sianon tu jolo niari. Songonon ma amion na pasahatna. Sahat sehat di aek nauli. Na marmuara tu aek na bontar. Sahat manian sahat mauli magabe. Sai tibu manian daganak nadua maruntung dohot mardoar.

Tando ni bagas godang domada mora nami. Mardua engsel sabariba. Tando lomo dot godang ni roha nami. Mardua tangan ma nian manjagit sada.

Tar boti mada hatana.

Upa upa tu na Marbagas

Upa upa upa

Upa upa da amang upa upa da inang.Upa upa jagit mada on tondi dot madan myu. Mare ma amang tondi muyu tu bagas taon. Mare ma inang tondi muyu tu bagas taon. Isondo bagas parsarimpunan ni tondi.

Ison mada on baya sere ni parmaenon. Sere magabe do baya on sere martua. Na di1patibal on baya di bulung ujung. Bulung ujung nai rait sian bonana. Marpangkal mada on inang dohot marujung. Marpangidoan tu Tuhanta.

Molo poken on amang inang i aek godang. Donok doi tu bandara. Molo lupa ho amang inang tu simatobang. Dunia akhirat ma ho sangsara.

Upa upa upa ni damang doon amang. Upa upa ni daiang doon amang.

Ison mada pira manuk na dihobolan. Na bontar boto sian luar na gorsing baya di bagasan. Sai harop ma iba tondi mulak tu bandan.

Muda ambasang boto di rao rao. Di rambas hodong do baya madabu lima

Gogo homu nian marusaho anso tarsampeon homu rukun islam napalimana.

Naik haji homu amang tu Moka.

Muda ambasang baya i rao rao Na magulang to bagasan tombang,

Gogo homu marusaho anso Adong balanjo matobang.

Upa upa upa marima tondi.

Molo poken amang di Simangambat, torang ari di kota nopan.

Gogo homu ma mar amal ibadat. Nangkan na ima baya haropan.

Tubuan laklak ma homu nian tubuan singkoro.

Tibuan anak dohot boru. Di Mura sada marlailai do baya singkoru.

Langk langka sada alaklai anso baru baru boru.

Sai ganda boto sigandua.

Pitu sundut ko iang suada mara. Pitru sundut hagaben. Pitu sundut hamamoraan.

Upa upa upa upa da amang inang marima tondi.

Horas

Kobar Suhut Mengawali Parpokatan

Assalamu alaikum ww.

Bahat hormat nami marsantabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi na toras na tobang sangape nai patobang di banua on. Lobi lobi tu banjaran haguruan dot umumna hita na madung juguk marlingkar di haratak siriaon on.

Olo ia boti dia ma dalan dalan ni parpunguanta di borngin ni hari on. Ngana salain ima satontang ni hata tangking nami ma jolo dokonon. On ma di manyogot ni arii. Madung sompat maon ami suru sinduru nami na ipas langka Manopoti tangga tangga ni koum nami sada parsada. Isi maninggalkon jamita suada halanganna anso rap marlagut ma jolo hita tu haratak nami on, luas sumbayang Isya. Mudah mudahan nian satontang naso adong halanganna. Madung doon tarpaida di hami. Di haranii imada. Ami sambut madaon dot lomo ot godang ni roha.

Di hara nion mada marpangkal marpangalaho di hajajuguk taon ngada salain on. Baen adong mada hata naget patujoloon. Alot ibagasan pamikir. Na sungkot ibagasan pangarohai. Na songonon ma ami marsapa sanga layak marohai ami pasurdu burangir na ipataya taya ni anak boru nami. Anso adong dalan nami marhata hata.

Aropku tar botima hatana. Wassalam.

Kobar Mora Setelah Burangir Disurdu.

Mukaddimah

Assalamu alaikum ww.

Bahat hormat nami marsantabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi na toras na tobang sangape nai patobang di banua on. Lobi lobi tu banjaran haguruan dot umumna hita na madung juguk marlingkar di haratak siriaon on.

Olo ia tutu. Taringot ni jamita ni suhut nangkin na mandokon na get adong dokonon na solot iroha. Ro sapa sapana sanga na bolas ma rohai i hombangkon anak boruna hombang napuran na iring dohot hatana. Anggo ningrohangku da baenna madung rap runggu do hita sude ison. Bope anak boru, mora dot mora ni mora. Lopus hatobangon dot na ipatobang dohot sareto guru guru dot umumna hita sadudena ison. Nga maua i surdu bei. Surdu homu ma burangir muyu. Dokon komu hata nai. Anso bisa ami manjawab dot manyaluangina.

Ning rohangku da tarsongoni ma hatana. Usudahi ma dohot salam.

Wassalam.

Kobar Suhut Setelah Burangir Disurdu.

Mukaddimah

Assalamu alaikum ww.

Bahat hormat nami marsantabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi na toras na tobang sangape nai patobang di banua on. Lobi lobi tu banjaran haguruan dot umumna hita na madung juguk marlingkar di haratak siriaon on.

Purjolo au mangido mohop betap adong naron hobar niba na hurang tama dot na hurang tupa. Naso pas artina di tibalanna. Naso tip tip di barisanna. Anso dapot kirana di mohofkon. Anso ulang adong parsangkutanna na so pade di hita tu hadopan ni Allah Subahanahu Wataala.

Hara nion mada marpangkal marpangalaho di hajajuguk taon ngana salain on. Ima satontang ni anak ma jolo dokonan na sian bagason ima na margoar si Ahmad. Na madung maluas pamikirna, godang ginjang pamatangta. Na madung pantas kiraanna on mamlus paradatan matobang. Songoni satontang ni jagar jagar ni morana na sian Gunung tua. Na madung tama tupa rupana manjadi panibalann ni hata. Na madung idokon ibana do tu simatobangna. Na madung martarimo doon tu tondi dot badanna.

Ngana manyuadaon paradatan natobang majolo dokonan. Sabotulna di sada ari na solpui madung sompat doon diranga rangai pinompar nami jagar jagar ni mora na di banjar lombang. Tai rupa rupa nii ngape adongna tarpaida imatana. Di harani ahai. Rupana dipamanat manat di banjar lombang. Na juguk dope jagar jagar ni mora di bangku sikola. Songoni di paligi ligi tu banjar dolok rupa na sarupo do hape.

Di harani i mada, namarmaksud ma ibana on patantan alang simanjojak, pagayung alang simangido. Ima na topet tu napa napa ni Gunung Tua. Disi ngana ibana on jomak jomak so marbudi. Na ingot do ibana on tu pituah ni ompunta na purjolo sunduti. Ijia adong rura, isi adong mali mali. Ijia adong huta, isi adong kahanggi. Na salaos iolos andungkonna do tu kahanggina bahaso ibana naget manjalaki rongkap ni tondina. Diharani imada, kahanggina pe martoruk abara do. So iboto ho anggi sian on sampe tu san, imada banjaran ni moranta. Pamanat manati ma dohot pamata matai ning ibana. Sanga adong tarpaida di matamu. Di harana imada mardalan dalan ma pinompar nami dot dongan sabayana. Sindorang adongma na tarpaida ni ibana ima jagar jagar ni mora nami na sian Gunung Tua. Disi isapai ibana doon sanga adong sangkut syair hatana ima dot halak na lebam. Nga pe dong da ujagit on ning jagar jagra ni mora nami. Tong anggo songini da. Ra do ho roai jadi rongkap ni tondiku. Anso adong mada parmaen ni damang daiang. Boti palanjang parkouman, ning ibana. Pabege pege i, godang do rahangku on. Ning jagar jagar ni mora nami. Tai anso iboto ho, i jagit on ngada tarjagit, itulak nga na tartulak. Arana ibaon na ipagodang godang ni simatobang do. Boti na igomgom ni paratadan. Jadi suat suat na di simatobang doon ning ibana. Tong anggo songoni do pangalahona. Au pe anggo songoni angkonna marsiuncang muli doon tu haratak nami. Dalan marjamita tu damang dainang anso rap mamboto sasudena. Jadi harani imada marsiuncang muli ma sinuantunas nami. Dijamitaon ibana ma tu simatobangna bahaso madung adong doon sangkut sair hatana ima tu jagar jagar ni mora nami na adong di Gunung Tua. Dia harani mada simatobang na pe margodang doon dot marlomo niroha. Sangking godangna lomo dot godang ni roha, ipalagut doon koum kahanggi, songoni banjaran ni anak boru dohot mora. Sanga songonjia doma patangkas hata on ma tu banjaran ni morana ima na i Gunung Tua.

Di hara nii mada di hari na solpu madung doon marsimulak muli hami. Ima banjaran ni anak boru mada tama dokonon. Ima na tu pamispisan ni mora nami. ima narsapa sanga tutu na peto parkobaran ni daganak na dua sanga na togu daya. Di harani mada di hari na solpu. Madung maon adong, panamana ma jolo tama dokonon. Madung doon marsuo ruas dohot buhu. Dihranii imada baen madung do marsuo ruas dohot buhu. Ro doon alus ni mora nami. Di jia naron tarpalagut kami koum kahanggi, songoni banjaran ni anak boru dot mora. Lobi lobi na tobang dot na ipatobang. Nangkon na ro do homu mandasdasi hata ma tama dokonon. Mangarti ma homu di Napa napa ni Gunung Tuaon. Marpastak Marpago pago do, Marranting marhuta soit. Marpasak marbaling baling. Maradat marugaling. Muloi sian najoloi sampe sannari.

Di harani mada isi. Ami baen doon sada padan parjanjian. Bahaso ami angkan naro. Di hara nii, di hari na solpu majolo tama dokonon. Madung doon langka hami. Ima na manopoti tona tona ni mora majolo tama dokonon. Disi madung doon tarsaloseon onma paradaton majolo dokonon onma di banjar ni mora. Di haranii mada disi martaringot tu hami na manyuru hami. Molo madung do da tarpagolom komu na golom i tangan. Tarsorahkon komu sere naso dapot di hasatukna. Mangido ma homu di moranta. Anso manogu nogu ning ibana. Disi mada, ari nasolpu ma jolo tama dokonon. Madung doon tartogu togu hami majolo dokonon. On ma gadis ni mora nami tu haratak na martua on. Dungi Les markini kini mada di pamikir nami. Nga tarsipkon be. Suang doon na mangan sorbuk. Jadi da ami palagutma koum kahanggi sasudena. Songoni anak boru dot mora, lobi lobi na ipatobang. Dalan marjamita bahason madung doda martamba pangisi ni bagas. Madung gok doon pangisi ni bagas mulai sian pantar dapur torus tu pantar luar. Jadi harani mada koum nami sasudena. Na sonon ma ami dalan marsapa satontang on. Sanga na turut doon marlomo dot margodang ni roha. Aropku da songon kami da banjaran ni kahanggi atau suhut ma tama dokonon. Madung doon turut marlomo dot margodang ni roha, Tai antong baen isondo banjaran ni anak boru dot kahanggi niba. Tontu ita sapa ma jolo ibana. Jadi da ning rohangku ihompas ma hata on tu banjara ni kahanggi. Usudahi ma dohot salam. Wassalam.

Jawaban Anak Boru Dalam Pokat Horja.

Mukaddimah

Assalamu alaikum ww.

Bahat hormat nami marsantabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi na toras na tobang sangape nai patobang di banuaon. Lobi lobi tu barisan haguruan na madung juguk marlingkar di haratak siriaon on.

Purjolo au mangido mohop betap adong naron hobar niba na hurang tama dot na hurang tupa. Naso pas artina di banjaranna. Naso tip tip di barisanna. Anso dapot kirana di mohofkon. Anso ulang adong parsangkutanna na so pade sian on tu pudi ni ari.

Olo mada tutu ning mora nami nangkin binege. Ima satontang pinompar ni mora niba on. Na marmaksud manjalaki rongkap ni tondina. Boti nangkin binege na mandapot tutur doon ibana sian simatobangna. I lului ibana do nangkin binege tumpuk ni mora di banjar on sanga adong do jagar jagar ni mora na tarsolong di mata. Tapi rupa ngana tartudu tumpuk, ngata tartodo bagian. Di hara nii painjang langka ma ibana, patantan alang simanjojak. Pagayung alang si mangido. Ima na topot ibana tu napa napa ni gunung tua. Sasampe ibana tu san, itopot ibana do tumpuk ni kahanggina. Arana inda lupa ibana tu pituah ni ompunta na parjolo sunduti. Ijia adong rura isi adong mali mali. Ijia adong huta, isi adong kahanggi. Na salaos ijamitan ibana ma tuhanggina bahaso ibana na get manjalaki rongkap ni tondi. Rupa kahanggina pe martoruk ni abara do na salaos i pation kahanggina ma sanga na jia tumpuk tumpuk ni morana. Ima di napa napa ni Gunung Tua. Satorusna da mardalan dalan ma ibana dot dongan sabayana. Disi rupa tarpaida ma diibana sada gadis ni mora na tama tupa rupana jadi panibalan ni hata. Laus isangkutkon ibana ma hata. Sareto isapai ibna sanga na adong do igolom ibana hata na sian alak na leban. Jadi ialus jagar jagar ni mora ni ibana ma bahaso inda adong hata na leban igolom ibana. Anak ni parkulahan nami pe marsapa sanga ra dongan sangkut marpaya sanga ra dongan saparuntungan. Artianna jadi parmaen ni simatobangna ma tama dokon. Jadi mangalus mada jagar jagar ni mora. Pabege bege on da, godang dohot lomo do on rohangku. Tai so ibotoho da si anak namboru. Harani iba na gonggom ni paradatan. Ijawab on inda tarjawab. I tolak on inda tar tolak. Sudena marsahat di simatobangku do. Ning jagar jagar ni mora ma tama dokonon. Jadi dungi, marsiuncang muli ma anak namboru nami ti haratak on. Sareto manjamitaon bahasa ibana madung manyangkutkon hata dot jagar jagar ni morana i gunung Tua. Pabege bege i, godang dot lomo doma roha ni simatobangna. Sareto ipalagut ibana ma koum kahanggi, anak boru songoni morana. Salaus mangido pokat sanga songonjia do paujung hagiut ni roha ni pinompar ni mora nami. Di si rupa madung gok do pantar tonga dot pantar luar. Dapot do pokat ni hata. Sarumbuk do parkobaran ni kanahanggi, mora dohot anak boru sasudena. Songoni juo dohot mora ni mora niba di napa napa ni Gunung Tua. Pendek kata dapot juo do marsuo ruas dohot buhu satontang mora na di haratak on songoni juga mora ni ora na di Gunung Tua. Satorus na baen na markini kini dope rupa di pamikir ni mora niba. Marhajat mada ibana palugut maradu parkouman sasudena. Marsapa ma ibana sanga turut doon sasudena marlomo dohot margodang ni roha. Jadi da anggo iba barisan ni anak boru, na dot ama iba on marturut dot marlomo godang ni roha. Harana na pabolak parkouman maon maksudnya. Tai antong baen isondo morana, mora ni mora bope natobang dot nai patobang, anggo nong rohangku. Siborang ma hataon. Usudahi ma dohot salam. Wassalam.

Jawaban Mora Dalam Pokat Horja

Mukaddimah

Assalamu alaikum ww.

Bahat hormat nami marsantabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi na toras na tobang sangape nai patobang di banuaon. Lobi lobi tu barisan haguruan na madung juguk marlingkar di haratak siriaon on.

Purjolo au mangido mohop betap adong naron hobar niba na hurang tama dot na hurang tupa. Naso pas artina di banjaranna. Naso tip tip di barisanna. Anso dapot kirana di mohofkon. Anso ulang adong parsangkuranna na so pade sian on tu pudi ni ari.

Olo ia boti jia ma nangkin kiraanna bona bona ni hata. On mantaringoti artina daganak na dua simanjujung. Na madung marrencana kiraanna maningkat tu alam matua bulung. Nangkin binege suhut marangka maranggi kiraan. Na madung tangkas dohot tingkos do nangkin bibege na madung dohot doon marlomo margodang ni roha. Songoni anak boru pe na turut doon mar lomo margodang ni roha. Lopus tu hami iompaskon hata on sanga na dohot do hami marturut dot marlomo dot margodang ni roha. Ison kami antong da barisan ni mora muyu, sakali homu antong margodang ni roha, saribu kali ami margodang dot marlomo ni roha. Tai bope soni antong kiraan baen na isondo barisan ni hatobangon. Namambai kiraanna hataon. Jadi iompas ma hataon tu barisan ni hatobangon.

Wassalam.

JAWABAN HATOBANGON SETELAH SEMUA SELESAI MARKOBAR

Mukaddimah

Assalamu alaikum ww.

Bahat hormat nami santabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi na toras na tobang sangape nai patobang di banuaon. Lobi lobi tu barisan haguruan na madung juguk marlingkar di haratak siriaon on.

Olo ia tutu ison au mangido mohop purjolo, nga binoto adong naron hata hata niba na sala. Na tarkadang ra marlangkap langkap. Na munombo naso pas tu banjaranna. Ison ma iba maingido anso mari sama sama ita pohomi.

Olo ia tutu. Dia ma nangkin dalan dalan ni parpunguan nita di borngin ni arion. Ngana lain ima satontang ni hata tangking muyu nangkin di torang ni arii. Na isuru muyu daganak na dua na monopoti tangga tangga ni kaoum muyu sada parsada. Ima suada halanganna dung salose sumbayang Isya anso rap runggu jolo hita sasudena ima tu haratak muyuon. Tombal naso adong halanganna madung runggu manian ison. Soni na adong halanganna madung ro do nangkin kirim solomna tua amu. Ima madung ipasampe tu homu suhut siabolonan.

Hara nii dia ma nangkin bona bona ni hata ima satontang surdu ni napuran muyu ima napurjolo nangkin binega ima na satontang Sinuan tunas moyu na margoar Ahmad, ima na madung marsuo dohot jagar jagar ni mora muyu ima na sian Gunung Tua. Isi pe rupa di hari na solpui madung adong doon parsarumbukan ni hata. Sareto madung do homu rupa marnoli noli ima manyuruk pamispisan sendal ni mora muyu. Buat manastasi hata humata ni daganak nadua. Mudah mudahan nian ning hata muyui nangkin na madung dapoy doot parsarumbukan ni hata. Songoni homu banjaran ni parkulahanna madung dapot do on homu marsi olo oloan dot mora muyu songoni mora ni mora muyu. Maralus do mora moyu. Ngana so godang roa nami di homu sude kaum nami on. Angke antong iboto homu do di napa napa Gunung Tuaon. Mar pastak doon magpago pago. Marranting marhuta soit. Maradat mar ugari muloi sian najoloi sampe sannari. Nangkon na ro do homu mandasdasi hobar on. Aranii ijia maso dohot atia. Tarpalugut kami koum kahanggi, tarlobi lobi banjaran ni mora nami songoni na toras na tobang songoni barisan ni harajaon, angkan na rodo homu mandasdasi manyangkili hata ni paradatanna, boti ma hata ni mora muyu.

Di harani rupa , ima di poken nalewat. Madung isuru homu ma sada utusan ima namanopoti padan parjanjian. Tu gunung Tua ima na mandasdasi hata humata ni adat. Di ujung ni hata nangkin rupa madung tarpatidaon homu do lomo ni godang ni roha myu. Tando tando marutang sapanjang paradatan. Mangido homu di mora muyu. Arani mora muyu madung manggolom golom. Di si rupa di potang ni ari. Martoruk ni abara do rupa barisan ni mora muyu. Na pasurduon ima jagar jagar ni mora muyu. Ima tu talapak tanaan muyu. Sareto madung tartogu togu homu do jagar jagar ni mora muyu, Sahat torkis ima tu bona bulu ni huta on. Ima tu haratak na martua on.Isi pe madung gok ma ningkomu pangisi ni bagas. Muloi sian pantar tonga sampe tu pantar luar.Sareto homu pe barisan ni simatobangna, songoni namar kahangi dot anak boru, madung doon manyambut dohot margodang ni roha. Salaus isurdo homu napuran muyu di borngin ni arion. Namarsapa homu nangkin binege. Sanga na turut doon nangkin sasudena binege marlomo dot margodang ni roha. Songoni tu barisan ni kahanggi muyu. Songoni tu barisan ni anak boru nangkin namanungkoli ma jolo ningiba tama dokonon. Lopus tu barisan ni mora ni mora na mandondoni Madung do nangkin binege marjamita mandokon na turut ma nangkin binega marlomo dohot margodang ni roha. Songon jia nangkin lomo dot godang ni roha muyu nangkin binege. Ami pe barisan ni na tobang dot na ipatonang Na lumobi dope lomo dot godang ni roha nami, satontang domu domu ni daganak na dua simanjujung. Hara nii, madung sauduruan do nangkin binega hata. Suang songon na mardalan i ginjang gadu. Anggi haranii anggo hami barisan ni na tobang dot na ipatobang ngana maroban gunting bola bola on. Na maroban jait domu domu doon. Ima tu barisan ni mora muyu songoni barisan ni mora muyu. Jadi anggo ning rohangku da. Matobang ma hataon. Usudahi ma dohot salam.

Wassalam.

Jawaban Mora Setelah Suhut Akan Manyurdu Burangir krdua

Mukaddimah

Assalamu alaikum ww.

Bahat hormat nami santabi sapulu tu mora ni mora nami namarangka maranggi maranak marama, sapulu noli ami marsantabi di hita namarkula markahanggi maranak boru songoni marhatobangon. Simurung lobi na toras na tobang sangape nai patobang di banuaon. Lobi lobi tu barisan haguruan na madung juguk marlingkar di haratak siriaon on.

Onpeda ambaen na adong dope nangkin naget jamitaon ni suhut. Na adong dope nangkin ning ibana na solot ibagasan ni roha. Burangir pe antong na adong dope itonga tonga. Onpeda. Dokon komu ma hobar nai. Burangir nai lalu madai. Dokon komu ma jojor. Asal ma na sauduran dot napurjolo. Ngana pola beibe. Pasampe homuma. Tarsongonima hatana. Usuidahima dohot salam. Wassalam.